Blag Forbairt Naíonraí Teoranta

Tá an tAire Oideachais Ruairí Quinn chun €40,000 a chur ar fáil chun sa dóigh is gur féidir seisiúin traenála frith-bhulaíochta a reáchtáil do thuismitheoirí. Déanfar cothrom le 70 rang a reáchtáil ag baint úsáide as an mhaoiniú seo. Is iad an Chomhairle Náisiúnta Tuismitheoirí (Bunbhrainse) agus an an Chomhairle Náisiúnta Tuismitheoirí (Iar-bhunoideachais) a dhéanfaidh na cúrsaí seo a sheachadadh.

Forbraíodh an tionscnamh nua seo chun tacú le cur i bhfeidhm an Phlean Gníomhaíochta ar Bhulaíocht, plean a éilíonn traenáil agus acmhainní a bheith curtha ar fáil do thuismitheoirí agus do bhoird bhainistíochta.

D’fháiltigh Áine Lynch, príomhoifigeach Bhunbhrainse na Comhairle Náisiúnta Tuismitheoirí roimh scéal an mhaoinithe,

“Tá ról ríthábhachtach ag tuismitheoirí i dtacú lena bpáistí agus leis an scoil áitiúil, agus tabharfaidh an infheistíocht seo sna tuismitheoirí deis dóibh an ról sin a chomhlíonadh ar bhealach níos feasaí.  Molann muid go mór do thuismitheoirí leanaí bunscoile agus iarbhunscoile freastal ar an traenáil agus tacú lena bpáistí agus scoileanna dul i ngleic leis an mbulaíocht,” a dúirt sí.

Chuir an tAire leis an mhéid seo a rá gur gá dul i ngleic leis an mbulaíocht ag gach leibhéal.

“Ní fadhb í an bhulaíocht ar féidir le scoileanna dul i ngleic léi leo féin. Tá ról tábhachtach le himirt ag tuismitheoirí, ag teaghlaigh agus ag an mórphobal i ndul i ngleic leis an mbulaíocht, agus i dteagasc leanaí maidir le conas caidrimh a bhainistiú, conas bheith athléimneach agus conas bá a léiriú le daoine eile.”

An bunscéal ar fáil anseo: http://www.thejournal.ie/anti-bullying-parents-course-1084398-Sep2013/

Maíonn an Chomhghuaillíocht um Chearta Leanaí go dtéann an bualadh i bhfeidhm ar fhéinmheas leanaí agus go gcruthaíonn sé gá le smacht níos dáiríre. Mar gheall air sin tá cosc iomlán ar bhualadh leanaí á éileamh ag an gComhghuaillíocht um Chearta Leanaí. Sonraíonn dlí na hÉireann go bhfuil rogha ag tuismitheoirí maidir le pionós measartha nó réasúnta na roghnú dá bpáistí. Tá go leor scríofa ag grúpaí leanaí éagsúla chuig Comhairle na hEorpa a chuireann faoi deara gur sárú cearta leanaí  é an rogha atá ag tuismitheoirí maidir le pionós réasúnta a roghnú. Thug Tanya Ward, príomhoifigeach na Comhghuaillíochta um Chearta Leanaí gur ionann bualadh leanaí mar phionós agus sárú a gcearta. Bunscéal ar fáil anseo: http://www.newstalk.ie/AUDIO:-Smacking-children-causes-deviant-behaviour–rights-group

Léiríonn torthaí shuirbhé de chuid TheJournal.ie ar an ábhar ag dáta scríofa an ailt seo (16/9/2013) nach dtacaíonn ach 13% dóibh siúd a chaith vóta le cosc iomlán ar bhualadh leanaí. Chreid 48% de vótálaithe go gcreideann siad nár chóir cosc a chur ar bhualadh agus ní raibh 13% de vótálaithe cinnte. Is féidir do vóta féin a chaitheamh ar an ábhar anseo: http://www.thejournal.ie/poll-smacking-children-1064811-Sep2013/?utm_source=facebook_short

Tá sé ráite ag os cionn cead saineolaí idir múinteoirí, scríbhneoirí agus scoláirí go bhfuil polasaithe luathoideachais Rialtas Shasana ag déanamh dochair do shláinte agus do leas leanaí. Dar leo, is tairbhiúla i bhfad do leanaí a bheith ag foghlaim trí mhodh an tsúgartha – an modh foghlama atá in úsáid i naíonraí na tíre seo.

Tá na speisialltóirí oideachais seo i ndiaidh litir a scríobh chuig an rúnaí stáit thall, Michael Gove, ag éileamh go dtugtar deis do leanaí bheith ag foghlaim trí shúgradh seachas trí bheith ag ullmhú le haghaidh ceachtanna foirmeálta ag an aois óg sin. Tá sé sonraithe sa litir nach dtacaíonn an taighde is déanaí ar an ábhar le múineadh foirmeálta don aoisghrúpa sin nó le tús a chur leis an tástáil ag aois óg. 

Ba iad an ghluaiseacht ‘Save Childhood‘  a rinne na socruithe maidir le scríobh an litir seo agus tá feachtas á sheoladh acu d’arb ainm ‘Too Much, To Soon’. Tá sraith athchóirithe á éileamh ag an ngrúpa seo agus teastaíonn sé uathu gur creatlach luathóige do réamhscoileanna bunaithe ar mhodh an tsúgartha, agus atá ‘oiriúnach ó thaobh forbartha de’, a bheas mar thoradh ar a gcuid iarrachtaí.  Agus í ag déanamh tráchta ar an gceist seo bhí an méid seo a leanas le rá ag Wendy Ellyatt, stiúrthóir bunaithe na gluaiseachta,

“In ainneoin go dtugtar tús áite don fhoghlaim shóisialta agus mhothúchánach i 90% de thíortha an domhain agus nach gcuirtear tús leis an scolaíocht foirmeálta go dtí aois a sé nó a seacht, tá an chuma ar an scéal i Sasana go bhfuil muid thar a bheith tiomanta maidir le cloí leis an dtuairim earráideach seo gur ionann tosú níos luaithe agus torthaí níos fearr.”

Tuilleadh ar an scéal seo ar fáil anseo.

I bhfíseán na seachtaine seo I dtreo Curaclaim Comhtháite Teanga san Oideachas Luath-Óige agus sa Bhunoideachas, pléann an Dr. Pádraig Ó Duibhir, léachtóir i gColáiste Phádraig, Droim Conrach, a chuid taighde ar an ábhar seo (príomhtheachtaireachtaí agus impleachtaí don chleachtas).  

Tháinig sé chun cinn sa taighde go raibh bealach níos éifeachtaí ann chun teangacha a mhúineadh (ó thaobh sealbhaithe de), trí aird na bhfoghlaimeoirí a dhíriú ar na cosúlachtaí agus ar na héagsúlachtaí idir an mháthair teanga agus an dara theanga, nuair a dhéantar seo i gcomhthéacs churaclam comhtháite teanga.

Éist leis an Dr. Pádraig Ó Duibhir ag plé an ábhair seo ach cliceáil anseo.

Straitéisí chun scileanna sóisialta tábhachtacha a mhúineadh do pháistí óga

Is féidir le tuismitheoirí cuidiú lena leanaí scileanna agus iompar nua a fhoghlaim ar bhealach dearfach trí chleachtadh, trí mholadh, trí noda a thabhairt agus trí iompar áirithe a chur ar a súile dóibh, dar le taighde. 

Tá scileanna sóisialta a theagasc do leanaí ar na róil is tábhachtaí a bhaineann le bheith i do thuismitheoir. Cuimsíonn na scileanna sóisialta seo roinnt, sealaíocht a dhéanamh, agus deiseanna a thabhairt do dhaoine eile labhairt gan briseadh isteach orthu. Foghlaimíonn go leor páistí na scileanna sóisialta seo trí bhreathnú ar iompar dhaoine eile thart orthu agus trí aithris a dhéanamh ar an iompar sin.

Bíonn gá ag páistí eile le treoir soiléir chun na scileanna seo a fhoghlaim áfach. Bíonn a leithéid de threoir naoi n-uaire níos éifeachtaí i bhforbairt na scileanna seo ná cur chuige a bhaineann le smacht. Creatlach amháin atá éifeachtach do thuismitheoirí chun na scileanna seo a fhorbairt ina leanaí ná cur chuige na ceithre ‘P’ (Practice, Praise, Point Out, agus Prompt).

Cleachtadh (practice): Inis don pháiste go bhfuil sibh chun iompar /scil nua a chleachtadh agus bain triail as an iompar seo i réimse suíomhanna éagsúla trí ról-imirt. Tá míniú ar an fáth a bhfuil sibh ag tabhairt faoin iompar seo tábhachtach. Ba chóir an scil nua a chleachtadh cúpla uair gach lá ar feadh seachtaine nó coicíse.

Moladh (praise): Tabhair moladh nó bronntanas don leanbh as an scil/ iompar nua a chleachtadh. Ná gabh thar fóir le moladh / bronntanas – is leor scéal breise a léamh am luí.

Cuir an iompar ar a súile dóibh (point out): Déan an scil / iompar seo a aibhsiú don leanbh i d’iompar féin nó in iompar leanaí eile. Is féidir dea-shamplaí a aibhsiú i gcláracha teilifíse leanaí freisin nó i leabhair.

Tabhair noda (prompt): Tabhair noda don leanbh faoi shuíomhanna ina bhfuil sé oiriúnach an scil / iompar nua a úsáid.

Léigh tuilleadh ar an gcreatlach seo, mar aon le comhairle faoi scileanna láimhseála feirge a fhorbairt i do leanbh, i bpáipéar taighde Christopherson ach cliceáil anseo. 

Tá dul chun chinn nach beag déanta acu san Fhionlainn ó thaobh oideachais de le blianta beaga anuas. Tá an cur chuige ar leith a bhíonn in úsáid acu maidir leis an oideachas i ndiaidh córas scoile na tíre a chruthú ar na córais is éifeachtaí timpeall na cruinne. Ach tá éacht eile bainte amach anois ag Rialtas na Fionlainne anois – tá siad i ndiaidh bealach a aimsiú leis an ráta báis naíonán sa tír a ísliú.

Chinn an Rialtas céanna 75 bliain ó shin gur chóir go mbeadh an tús céanna ag gach leanbh a thagann ar an saol, beag beann ar an gcúlra acu. Mar sin, ó na 1930í ar aghaidh tá an “bosca máithreachais” á thabhairt amach do gach bean a bhfuil ag súil le leanbh. Tá gach rud a bheas de dhíth ar mháithreacha i ndiaidh na breithe le fáil sa bhosca seo – clúidíní, táirgí folctha, mála codlata, crothal srl. san áireamh. Tá an bosca féin deartha ar bhealach speisialta fiú a ligean do thuismitheoirí é a úsáid mar a bheadh a cliabhán ann.

Creidtear go bhfuil dlúthnasc ann idir an smaoineamh nuálach seo agus rátaí báis naíonán a bheith íslithe san Fhionlainn. Is fiú a lua go bhfuil rátaí báis naíonán san Fhionlainn ar na rátaí báis is ísle ar fud an domhain. Tuilleadh ar an scéal seo anseo.